LAOAG CITY – Ikagkagumaan ni Senate Committee on Foreign Relations Chairperson Imee Marcos a maaddaan ti sabali pay a panagdengngeg mainaig iti nagbalin a panangarestar ti International Criminal Court ken ni dati a Presidente Rodrigo Duterte.
Segun ken ni Sen. Marcos, pakairamanan pay dagiti kakaduana nga isuda Sen. Bato dela Rosa, Sen. Robin Padilla ken Sen. Alan Peter Cayetano ket agkidkiddaw met ti maysa pay a public hearing gapu ta adu pay ti nasken a matingiting kadagiti detalye a rimmuar a saan pay a nalawag kadakuada.
Inbatadna a karaman ditoy no asino ti akinkukua ti eroplano a nangilugan ken ni dati a Presidente Duterte idiay The Hague no sadinno nga adda dagiti nairuar a ladawan dagitoy a namin-adu a aras a nagluganan ni Presidente Ferdinand Marcos Jr.
Inlawlawagna nga idi pay napalabas a tawen a nakastrek ditoy pagilian dagiti tauhan, imbestigador, abugado ken security experts ti International Criminal Court a maisupadi dagiti ibagbaga ti ahensia ken ti Philippine National Police (PNP) a kellaat laeng ti nagbalin a panangarestar iti dati a Presidente.
Nupay kasta, kalikagum man ni Sen. Marcos a mangiwayat ti maysa pay a panagdengngeg ngem saanna pay a maaramid gapu ta awan pay ti naimbitaranna a saksi a mangilawlawag kadagiti nasao nga impormasion.
