LAOAG CITY – Manamnama iti pannakaipatakder ti Swine Industry Recovery Project component 2 iti paset ti Brgy. Camangaan ditoy ciudad ti Laoag.
Segun kenni Dr Jayvee Bryan Carillo, ti center director iti Agriculture Training Institute, daytoy ti kaunaan a pasilidad a maipatakder ditoy Ilocos Norte ken maikatlo pay laeng iti intero a pagilian.
Kunana a daytoy a proyekto ket nagbinnuligan ti Agricultural Training Institute Regional Training-1 ken ti lokal a gobierno ditoy ciudad ti Laoag.
Inbatad na a daytoy a proyekto ket naiyalokaran ti P1.5 million a pisos nga agserbi kas fattening ken breeding station.
Kabayatanna, nagyaman ni Carillo iti gobierno lokal ditoy ciudad iti panangawat da ti imbitasyon da a makibinnulig iti nasao a proyekto.
Patien ti gobierno lokal a babaen iti nasao a proyekto ket makatulong para iti al-alisto a panagrekobre ti ciudad manipod iti epekto ti African Swine Fever ken tapno maipasigurado a makaanay ti supply ti karne ti baboy a maidiaya kadagiti consumers ditoy ciudad ti Laoag.
