LAOAG CITY – Inbatad ti Vatican nga umabot iti agarop 50 ribo a tattao ti napan nagpila iti nakurkurang ngem 24 nga oras tapno mangipaay ti maudi a respeto ken ni Pope Francis a nakamansayag iti St Peter’s Basilica.
Segun iti Vatican, maisardeng koman ti panagserrek dagiti tattao iti simbaan iti Vatican City intono tengnga ti rabii ngem naiyalud-od ti oras a panagbisita gapu iti kaado dagiti mayat a mapan mangkita iti pimmusay a santo papa.
Gapu iti daytoy, agpatpatnag ti public viewing ken mapaserraan laeng ti simbaan iti oras ti alas-sais agingga iti alas-siete ti bigat intono bigat para iti maiyuswat a panagdalos.
Maitabon ti Santo Papa intono sabado, Abril 26 iti St. Mary Major, maysa kadagiti uppat a simbaan ti Christendom iti Rome ken manamnama ti panagatendar dagiti naruay a world leaders karaman dagiti deboto ti Romano Katoliko iti intero a lubong.
Maipalagip a pimmusay ni Pope Francis idi Lunes iti tawen na a 88 kalpasan a nagpasar iti stroke.
Immunan a nagtalinaed iti ospital iti uneg ti lima a lawas gapu iti sakit na a double pneumonia.
Ni Pope Francis ti kaunaan a Latin American leader ti Catholic Church ken nagserbi daytoy iti 12 a tawen.
