LAOAG CITY – Pinalagipan ti Civil Aviation Authority of the Philippines (CAAP) ti publiko nga agbibiahe iti sabali a pagilian a kanayon nga annadan dagiti pasaporte dagitoy.
Inbatad ni Civil Aviation Authority of the Philippines Spokesperson Eric Apolonio a nasken a kitaenda a naimbag ti proseso dagiti check-in ken immigration process tapno maliklikan ti aniaman a parikot.
Inlawlawagna nga uray adda ti kadua dagiti pasahero ket nasken latta nga iggemda dagiti pasaporteda.
Inabisoanna a no mabalin ket alaan nga umuna ti ladawan ti pasaporte sakbay daytoy nga ipaima kadagiti immigration officers.
Naammoan a ti nasao a rakurak ket kagiddan ti reklamo ti maysa a pasahero a nabati iti biahe gapu ta maipagarup a napigis ti pasaportena.
Mamati ni Apolinario nga awan ti biddot nga inaramid dagiti immigration officers gapu ta tunggal counters iti lugar ket addaan ti Close Circuit Television wenno CCTV camera a mabanbantayan dagiti garaw dagitoy.
