LAOAG CITY – Pormalen a nainaguraran ti baro nga elevator ti Laoag City General Hospital wenno LCGH nga inatendaran da Dr. Marsha Lou Wapan, Dr. Mary Ann Luis ken dadduma pay a sections head iti nasao nga ospital pakairamanan dagiti sumagmamano nga opisial ti lokal a gobierno ditoy siudad ti Laoag.
Gapu iti daytoy, naragsakan ni Dr. Wapan, mangidadaulo ti Laoag City General Hospital iti pannakaikabil ti baro nga elevator.
Segun kenkuana, babaen iti daytoy ket dakkel a makatulong kadagiti pasiente a mapmapan agpapaagas iti nasao nga ospital.
Inbatadna nga iti pannakaikabil ti baro nga elevator ket tapno saanen a marigatan dagiti pasiente, medical staff ken kangrunaanna kadagiti senior citizen ken addaan iti rangkap ti bagi.
Inlawlawagna a daytoy a proyekto ket pinundoan babaen iti supplemental budget ti lokal a gobierno ditoy siudad.
Inpasiguradona nga ar-aramidenda ti amin a kabaelanda tapno mapapintas ti serbisio a maipaay kadagiti tattao nga agturturong iti Laoag City General Hospital.
Maipalagip a naitantan daytoy gapu ta iti kallabes ket nagsukat ti lokal a gobierno ti supplier ti elevator ti Laoag City General Hospital.
