LAOAG CITY – Nangiruar ti pammalagip ti Commission on Elections nga ipatungpalna ti “ayuda ban” iti uneg ti 10 nga aldaw a dumanon agingga inton Mayo 12.
Inbatad ni Commission on Elections Chairman George Erwin Garcia a mangrugi inton Mayo 2 agingga iti Mayo 12 wenno aldaw ti panagbubutos, maipawil ti amin a klase ti ayuda.
Naammoan a ti ayuda a maipasardeng nga ipapaay ti gobierno ket pakairamanan ti Assistance to Individuals in Crisis Situations (AICS), Tulong Panghanapbuhay sa Ating Disadvantaged/Displaced Workers (TUPAD), 4Ps ken ti Ayuda para sa Kapos ang Kita Program (AKAP).
Inbabawin ti Commission on Elections ti immunan nga exemptions iti spending ban a mabalin pay nga ipaay nga ayuda.
Inlawlawagna a sumango ti kaso ti mangipaay ken mangipatungpal ti ayuda kadagiti nasao nga aldaw.
Iti babaen ti Omnibus Election Code, mabalin a maibalud ti saan a bumaba iti maysa a tawen ken saan a lumabes iti innem a tawen malaksid kadagiti pannusa nga inkeddeng ti linteg.
Immuna nga in-exempt ti Commission on Elections ti P20 iti kada kilo a Rice Project ti Department of Agriculture (DA) iti 45 nga aldaw nga election spending ban sakbay ti panagbubutos inton Mayo 12.
