LAOAG CITY – Dinungpar ti maysa nga SUV dagiti agdudupudop a tattao iti Lapu Lapu Day Block Party idiay Vancouver, Canada.
Segun ken ni Bombo International News Correspondent Hector Baytec manipud idiay Vancouver, Canada, ti driver ti SUV nga agmaris ti nangisit ket maysa a lalaki a mapattapatta nga agtawen ti 20 ken saan pay a masinunuo dagiti otoridad no daytoy ket maysa a Vietnamese, Korean wenno Chinese national.
Inbatadna nga agarup alas otso ti rabii ti Sabado, oras idiay Canada ket kellaat a dinungpar ti SUV dagiti agdudupudop a tattao a nagatendar iti Lapu Lapu Day Block Party.
Gapu iti daytoy, adda dagiti natay ken nagsagaba ti nakana a sugat no sadinno a rumrummuar a karaman ditoy dagiti sumagmamano a Pilipino.
Nupay kasta, inlawlawagna a manarimaan pay laeng ti panangberipikar iti imbesigasion dagiti otoridad iti napasamak nga insidente.
Kunana a kaaduan kadagiti tattao ket manarimaan nga agur-uray kadagiti food trucks a nakapuesto iti igid ti kalsada.
Mainaig iti daytoy, inpakaammo ni Baytec a maysa kadagiti organizer ti nasao nga aktibidad ti nangidiaya kenkuana ti libre nga agpuesto ngem saan daytoy a natuloy a napan gapu ta saan a nasayaat ti riknana kadayta a gundaway.
Kabayatanna, naammoan a ti Lapu Lapu Day Block Party ket tinawen a selselebraran kas panangsaludar iti kaunaan a bannuar ti pagilian a Pilipinas nga atendaran ti rinibu a tattao.
Iti agdama, nagtalinaed iti pagbaludan ti suspek manamnama ti pannakaipila ti kaso kontra kenkuana.
