LAOAG CITY – Inpasa ti Sangguniang Panlungsod ditoy siudad ti Laoag ti maysa a resolusion a mangkiddaw iti City Environment and Natural Resources Office babaen ti pannakikammayet ti City Social Welfare and Development Office a maaramat iti sabali a banag dagiti campaign poster materials iti sabali a wagas kalpasan ti eleksion.
Segun iti Chairman ti Committee on Environment, dagiti campaign poster materials ket mausar tapno itandudo dagiti kandidato ita nga eleksion.
Inbatadna nga iti agdama ket adu dagiti campaign poster materials a nakaikabil kadagiti nagduduma a barangay ditoy siudad pakairamanan dagiti pagtaengan no sadinno a saanen a napintas a kitkitaen gapu ta dagitoy ket mabalin a mangrugit laeng iti aglawlaw ken no mabaybay-an agingga inton malpas ti eleksion ket dakkel a problema.
Gapu iti daytoy, kinuna ti opisial a rumbeng a mangkita ti wagas ti lokal a gobierno tapno mapagtalinaed a nadalus ti aglawlaw kalpasan ti eleksion.
Naammoan a nakailanad iti 1987 Philippine Constitution a rumbeng a protektaran ti lokal a gobierno ti aglawlaw a rason no apay nga inkiddaw ti opisial iti City Environment and Natural Resources Office a mangaramidda ti programa a mang-rescue wenno re-purpose dagitoy a banag ken makatulong tapno nayon a pagtrabahoan ken pamastrekan dagiti residente ditoy siudad ti Laoag.
Inpakaammona a basar iti pannakisarsaritana iti mangidadaulo ti City Environment and Natural Resources Office ket immanamong daytoy ken kunana a mabalin dagitoy a ma-recycle babaen ti panagaramid ti bag, school supplies, composting kits ken dadduma pay.
