LAOAG CITY – Ad-adda pay a pinaigetan ti health authorities ti Democratic Republic of the Congo iti tulong ti World Health Organization ti emergency response kontra iti outbreak ti anthrax nga addaan ti 16 a mapagat-atapan a kaso ken maysa a kumpirmado a kaso iti North Kivu Province.
Ti outbreak ket adda ti pakainaiganna iti kaso idiay Uganda ken naapektaran ti uppat nga health zones iti Lake Edward isu a manarimaan a maisaysayangkat ti livestock vaccination ken dadduma pay a preventive measures.
Agar-aramid ti World Health Organization ti risk assessment tapno maduktalan ti kinalawa ti panagwaras ti impeksion ken supsupotaran dagiti otoridad iti surveillance, imbestigasion, medikal a suplay ken panangtaming kadagiti naapektaran.
Iti babaen ti One Health approach, nakitinnulong ti World Health Organization iti gobierno ken dadduma pay nga organisasion tapno lappedan ti panagwaras ti anthrax iti tao, ayup ken aglawlaw.
Maiwaywayat ti panagbakuna kadagiti ayup ken umiso a panagibelleng kadagiti bangkay dagiti natay nga ayup tapno maliklikan ti impeksion.
