LAOAG CITY – Inrakurak ti chairman ti Committee on Laws ti Sang Panlungsod ditoy ciudad ti Laoag a no bukod na man a biag ti agbalin a kasukat ti panangibutaktak na ti kinapudno ket ipalubos na basta para iti pagsayaatan ti bukod na a pagilian.
Daytoy ti nagbalin a rakurak na iti panagleppas na ti priviledge speech na kabayatan ti regular session iti konseho ditoy ciudad.
Immuna iti daytoy, kwinestyunaran na ti umno a trabaho dagiti kameng iti Philippine National Police kalpasan nga adda ti naidanun kenkuana a reklamo babaen ti maysa a residente ditoy ciudad a tiniliw dagiti tallo a pulis ken inbalud da ti tallo nga oras gapu iti panangikkat na kadagiti campaign posters nga adda iti alad ti solar na.
Segun iti opisyal, naipalaon iti paglintegan a karbengan ti maysa nga indibidual nga aramiden amin ti kayatna iti lugar a kukua na ken no saan nga ammo daytoy dagiti kameng ti pulisya ket ti dakkel a saludsud na ket no ania pay dagiti saan nga ammo dagiti maseknan a naipalaon iti paglintegan.
Inpetteng pay ti opisyal a kasanu a maiyimplementar a nasayaat dagiti kameng ti pulisya ti paglintegan iti pagilian no saan da nga ammo dagitoy a pagannurutan.
Mainaig iti daytoy, inpakaammo ti opisyal a nakasaritan na metten ti chief of police ditoy ciudad ken inpasigurado na kenkuana nga adda ti body worn camera a suot dagiti nadakamat a tallo a pulis, ngem saan nga agtugma iti immuna nga statement dagiti kameng ti pulisya nangtiliw ti nasao nga indibidwal.
Inpalgak pay ti opisyal nga addan dagiti naparangarag nga agisaysayangkat ti vote buying ditoy ciudad ken ti pannakaharass dagiti opisyal ken indibidual ngem awan ti makitkita na a tignay dagiti kameng ti pulisya.
Inpaganetget na a ti panagbalin a partisa ket rumbeng a maipaima laeng kadagiti politiko ken iti pannakaimplementar ti linteg ket maipaay kadagiti law enforcers kas iti Philippine National Police gapo ta no adda ti kanunongan da, patien ti opisyal nga adda ti injustice a mapasamak ditoy ciudad ti Laoag.
Kabayatanna, inpasigurado ti opisyal a mangipaay ti kopya ti privileged speech na iti National Police Commission (Napolcom) ken iti Philippine National Police Integrity Monitoring Group tapno maimbestigar ti arigna panagbalinen a partisan dagiti sumagmamano a kameng ti pulisya ditoy ciudad ken rumbeg a maisardeng dagiti saan a napintas nga ar-aramiden da.
