LAOAG CITY – Pinaltu-paltogan dagiti saan pay a nabigbig a suspek ti sango ti pagtaengan ni Barangay Chairman Sherman Valdez, ti Barangay Saud iti ili ti Badoc.
Segun kenkuana, agarup pasado alas siete ti rabii idi kalman ket nakigtot ti barona kalpasan nga adda ti kellaat a nagpaputok ti paltog iti batog mismo iti pagtaenganda.
Inbatadna a nakita ti barona a nakalugan ti 4 wheels dagiti suspek nga adda iti likudan ti napasamak nga insidente.
Kunana a naminpat a daras a nagpaputok dagiti suspek iti sango ti pagtaenganda no sadinno nga adda ti maysa a kapsula ti bala ti nakita ti barona iti kalsada.
Inlawlawagna a kalpasan laeng ti sumagmamano a minuto ket nairana nga adda ti dua a police patrol a manarimaan nga agpatpatrolya ti limmabas iti kalsada iti sango ti pagtaenganda.
Mainaig iti daytoy, mamati ni Kapitan Valdez nga adda ti maris pulitikana ti napasamak nga insidente.
Inpettengna nga awan ti ar-aramidenna nga aniaman a pammerperdi kadagiti kandidato ita nga eleksion isu a masdaaw daytoy no apay a napasamak daytoy kadakuada nangruna ket awan met ti maaw-awatna a pangta iti biag.
Kabayatanna, naammoan nga awan ni Kapitan Valdez iti pagtaenganda idi napasamak ti insidente gapu ta napanda gimmatang ti taraon para kadagiti agbanbantay ti Automated Counting Machine para iti eleksion iti barangayda.
