LAOAG CITY – Inpadanon ti nabara a kablaaw dagiti nagduduma a lider ti pagilian iti pannakapili ni Pope Leo XIV kas baro a Santo Papa.
Kaaduan kadakuada ket kalikagumda a makatrabaho ni Cardinal Robert Prevost kadagiti global issues.
Indauloan ni United States President Donald Trump no sadinno kunana a maysa a naisangsangayan ti panangpili ken ni Cardinal Prevost gapu ta isuna ti kaunaan nga American Pope.
Iti nagtipon a rakurak met da European Council President António Costa ken European Commission President Ursula von der Leyen ket mamati isuda nga usaren ti Santo Papa ti boses tapno pagkaykaysaen dagiti pagilian.
Kiniddaw ni Russian President Vladimir Putin a maaddaan ti nasalun-at a baro a Santo Papa.
Maipalagip nga itay alas-12:05 ti parbangon ti Biernes, oras ditoy Pilipinas idi rimmuar ti puraw nga asok iti Chimney ti Sistine chapel a mangipasimudaag nga addan ti napili a Santo Papa ti 133 a cardinals.
Kalpasan ti maysa nga oras ket rimmuar iti balkonahe ti St. Peters Square Basilica ni Cardinal Protodeacon Dominique Mamberti tapno irakurak nga addan ti baro a napili a Santo Papa.
Sumagmamano a minuto ket pormal a rimmuar ni Pope Leo XIV kagiddan ti panagpukkaw ti rinibu a tattao a nagatendar iti panangpili ti Santo Papa.
Iti umuna a panagsaritana kas Santo Papa ket kinablaawanna dagiti tattao.
Iti panagbitlana, kinablaawanna ti pimmusayen a ni Pope Francis ken ginutigotna ti publiko a lagipen dagiti inaramidna.
Nagyaman ti baro a Santo Papa kadagiti padana a cardinals a nangpili kenkuana.
Kalpasan ti panagsaritana iti Italian ket nagsaritan pay isuna ti Spanish.
Nakasagana daytoy a mangaramid ti wagas tapno adda ti nalawa a panagsasarita ken magun-od ti kinakappia.
