LAOAG CITY – Inlawlawag ni Atty. Nikki Pilar iti ili ti Bacarra ti isyu maipanggep ti maipagarop a panangpaikkatna ti transformer iti Brgy. 20, Pulangi iti nasao nga ili.
Patien na nga alisto a naperdi ti transformer gapu ta naidaras laeng a naikabil tapnu adda ti usaren dagiti residente.
Inbatad na a kasapulan a plastaren da a naimbag tapnu nasaysayaat ti pannakaipaay ti serbisyo kadagiti residente.
Innayon na a nailawlawag met daytoy kadagiti residente bayat ti panagturong dagiti lineman iti nasao a lugar.
Inpakaammo na nga urayenda ti availability ti transformer sakbay a maisubli iti nadakamat a barangay.
Kabayatanna, nagpadespensar ni Pilar iti napasamak ken inpasingked na nga awan ti pakainaigan daytoy iti pulitika.
Sungbat daytoy ni Pilar gapu ta ti patien dagiti residente a rason no apay a pinaikkat na ti transformer ket gapu iti pannakaatiw na iti kalepleppas nga eleksyon iti panagpaidasig na a para bise mayor iti ili ti Bacarra.
Iti agdama, ni Pilar ket agserserbi kas mangibagi iti National Electrification Administration ditoy probinsya.
