LAOAG CITY – Inbatad ni Police Lt. Col Andrew Rabang, ti chief of police ditoy ciudad ti Laoag a lehitimo ti inwayat da nga anti-illegal drug buy-bust operation a nakatiliwan ni dati a Barangay Chairman Edmond Domingo a residente iti Barangay 28 ditoy ciudad.
Segun ken ni Rabang, nabayagen a monmonitoren ti City Drug Enforcement Unit ni Domingo a maibilang kas Street Level Individual.
Kuna pay ni Rabang a mismo metlaeng a dagiti immunan a natiliw gapu iti illegal a droga ti nangibutaktak ti nagan ti dati a kapitan mainaig iti illegal nga aktibidad na.
Immunan nga inpetteng ni Domingo a saanna a bagi dagiti naala iti ikotna nga ebidensya no sadinno nga agdagsen amin ti 7 a gramo dagiti maipagarop nga illegal a droga nga agbalor ti 47,600 a pisos.
Nupay kasta, inadmitir na nga agus-usar iti illegal a droga no sadinno a ti naudi a panagusar na ket idi laeng sabado.
Iti agdama, nagtalinaed ni Domingo iti Philippine National Police ditoy ciudad ti Laoag ken sumango ti kaso a panaglabsing iti Republic Act 9165 wenno Comprehensive Dangerous Drugs Act of 2002.
Naamoan a ni Domingo ket naudi a nagserbi kas Barangay Chairman iti nadakamat a barangay idi 2013 ken daytoy ket drug surrenderee idi 2016
