LAOAG CITY – Inpasigurado ti Department of Justice nga usaren na amin a legal a wagas tapno maiserbi ti warrant of arrest kontra ken ni dati a presidential spokesperson Harry Roque ken dagiti dadduma pay a karaman iti illegal a POGO hub a Lucky South 99 iti Porac, Pampanga.
Inbatad ni Justice Asec. ken spokesperson Mico Clavano, possible nga agsurat da iti gobierno ti The Netherlands tapno ilawlawag ti kaso a sangsangwen ni Roque.
Kuna na a mabalin nga idalan da ti panangiserbi ti
warrant iti babaen ti International Criminal Police Organization (Interpol).
Inpetteng ni Clavano a napateg a maipasango ni Roque iti korte tapno masungbatan na dagiti akusasyon kenkuana ken maidatag na ti depensa na.
Maipalagip a nangiparuk-at ti warrant of arrest ti Angeles, Pampanga Regional Trial Court #RTC Branch 118 kontra kada Roque, Cassandra Li Ong, ken siyam a sabsabali pay para iti kaso a qualified human trafficking.
Ni Roque ket nagtalinaed idiay The Netherlands para iti asylum application na.
