LAOAG CITY – Nagtalinaed ti takder ni Vice President Sara Duterte nga awan ti namnamaen na ken sangwen na a situtured ti impeachment trial kalpasan a naiproklamaren ti 12 a baro a senador.
Kuna ti Bise Presidente a saanna a namnamaen ti maysa nga acquittal wenno uray verdict guilty para kenkuana iti agbalin a trial ken nagtalinaed ti takder na nga awaten na ti resulta daytoy.
Innayon ni Duterte a saanna nga ammo no kasanu ti panagbotos dagiti senador ken saan nga usto a bilangen a dagus ti botos gapu ta awan pay ti umdas nga ebidensya nga iggem ti kongreso.
Inpetteng na nga awan pay ti naipakita ti prosekusyon ken ad-adda manen a saan pay nga ammo ti publiko no ania a klaset ti depensa ti aramiden ti grupo na.
Inpalgak ti Bise Presidente a kayatna a matuloy ti trial tapno maaddaan ti ‘bloodbath’ iti kongreso.
Inpasigurado pay ti opisyal nga isuna ken ti legal team ket ‘fully engaged’ kadagiti preparasyon para iti trial a manamnama a maiyuswat iti katapusan ti Hulyo ti agdama a tawen.
