LAOAG CITY – Inpakaammo ni Mr. Jerry Carreon, School Principal ti Ilocos Norte National High School a sumangpet inton bigat, Mayo 20 iti oras ti alas kuatro ti malem ti sumurok maysa a ribu a delegates manipud iti National Capital Region para iti 2025 Palarong Pambansa.
Segun kenkuana, nakasaganan ti pagadalanda a mangakomodar kadagiti nasao a delegates gapu ta nakaplastaren dagiti amin a klasrum, comfort rooms, danum ken dadduma pay a kasapulan dagitoy.
Inbatadna a naiget a dinalusanda iti intero a pagadalan tapno napinpintas ken nasaysayaat ti panangsangaili kadagiti bisita.
Inlawlawagna a gimmatangda pay ti uppat a ribu a gallons kits nga addaan ti power pump no bilang agkaproblema iti suplay ti danum.
Kunana nga adda dagiti sumagmamano a pagadalan ditoy probinsia ti timmulong iti panagdalus ken panangiplastarda kadagiti kagamitan nga usaren dagiti delegates.
Mainaig iti daytoy, inpasingked ni Carreon ti naiget a pannakaipatungpal ti seguridad para kadagiti maseknan a delegates kabayatan ti kaaddada iti nasao a pagadalan babaen ti pannakikoordinarda kadagiti kameng ti Philippine National Police ken dagiti barangay officials.
Kabayatanna, naammoan a maiyuswat ti enrollment dagiti agad-adal ti Ilocos Norte National High School iti SPS Compound a masarakan iti akin-laud a paset ti gymnasium.
