LAOAG CITY – Nangipatulod ti National Food Authority ti surat kadagiti amin a Local Government Units a sakupen ti branch da ditoy Ilocos Norte mainaig iti P29 per-kilo-rice program.
Segun kenni Engr. Jonathan Corpuz, ti branch manager iti National Food Authority ditoy probinsya, gagem ti nasao nga addang ket tapno maipakaammo ken magutigot dagiti lokal a gobierno a manggundaway ti programa para kadagiti umili.
Inlawlawagna a masapol laeng a makikoordinar da iti Food Terminal Incorporated.
Kunana a ti nasao a programa ket mangipalubos iti lokal a gobierno a mangilako ken gumatang ti bagas iti 29 a pisos iti kada kilo iti National Food Authority.
Innayon ni Corpuz a dagiti bagas nga ilakoda iti nasao a presyo ket dagiti tallo a bulanen a na-stock.
