LAOAG CITY – Aminado ni Department of Education Secretary Sonny Angara nga adda ti panagkurang iti implementasyon ti Senior High School (SHS) curriculum iti babaen ti K to 12 program, ngem inpetteng na a ti Kongreso laeng ti addaan ti bileg nga agdesisyon no itultuloy daytoy wenno saan.
Rakurak daytoy ni Angara kalpasan a nagpila iti gakat ni Senate President Pro Tempore Jinggoy Estrada a gagem na nga ikkaten ti Senior High School gapu iti maipagarop a pannakapaay a manggun-od ti kangrunaan a gagem nga agparnuay kadagiti job-ready a graduates ti programa, 12 a tawen kalpasan a naipasa ti Republic Act No. 10533 wenno Enhanced Basic Education Act of 2013.
Iti babaen ti Senate Bill No. 3001 ni Estrada, inlungalong na nga isubli iti kindergarten, innem a tawen iti elementary, ken uppat a tawen iti high school no sadinno nga awan ti Senior High School.
Kabayatanna, inpakaammo ni Angara a mangrugi iti School Year 2025–2026, mangiyuswaten ti Department of Education (DepEd) ti pilot implementation ti baro a Senior High School curriculum iti 841 a pagadalan.
Inpetteng na a saan a napintas ti nagbalin nga implementasyon ti Senior High School iti napalabas a maysa a dekada gapu iti kaado dagiti asignatura ken kaawan ti wayawaya dagiti estudyante nga agpili kadagiti subject da.
Immunan nga inpetteng ni Senador Sherwin Gatchalian a masapol a tungpalen ti K to 12 program ti orihinal a gagem na nga iyababa ti college education iti babaen ti panagkissay kadagiti maul-ulit a subjects iti kolehiyo.
