LAOAG CITY – Kalikagum ti Sang panlungsod ditoy ciudad ti Laoag a mammaminsan a kolektaren ti renta ti Supershopping Market Inc iti paset ti daga a pagbalbalinen a parking space ti nasao nga establishimento.
Daytoy ket kalpasan nga indasar ni Konsehal Conrado Respicio, ti mangidadaulo iti Committee on Ways and Means a kasapulan a mairenew iti contract of lease ti nasao a pasdek negosyo babaen iti pannakipinnirma ti gobierno lokal ditoy ciudad.
Inbatad na a ti madakdakamat a daga ket masarakan iti west side ti Laoag Central School nga aglawa ti 289.25sqm ken agserserbi daytoy kas parking area dagiti costumers ti nasao a pasdek
Kunana a nalpasen ti kontrata iti panangupa da manipod idi Nobyembre 22, 2012 agingga iti Nobyembre 22, 2022.
Inpakaammo na pay a saan a makabayad ti nasao a kompanya nu awan ti Memorandum of Agreement.
Kabayatanna, kiniddaw ni Konsehal Jayson Perera iti panangpalagip ti executive office a kasapulan a mailanad iti katulagan a mabayadan ti advance iti 10 a tawen a renta ti nasao a daga gapo ta isu ti nagbalin a tulagan.
Inlawlawag na a rumbeng a nangatngato ngem 3% koma ti pagngatwan iti kada tawen ti renta da ngem saan dan nga intuloy basta kasapulan da a bayadan ti advance ti 10 years a renta.
Segun kenkuana, ti nasao a katulagan ket napinpintas ngem iti gagangay a panagbayad da a tinawen nga half million wenno 71,148.21 pesos iti kada bolan.
Inpetteng na a daytoy ket tapno mausar nga insigida ti nasao a makolektar a kwarta kadagiti nagduduma a proyekto nangruna iti maestablisar a Laoag City Plaza nga aglawa iti 50 nga ektarya.
