LAOAG CITY – Iresrespetar ti Malacañang ti desision ni Vice President Sara Duterte a saan a panagatendar iti maikapat nga State of the Nation Address wenno SONA ni Presidente Ferdinand Marcos Jr. inton Hulio 28.
Inbatad ni Palace Press Officer Claire Castro, adda iti desision met ti Bise Presidente a saan nga agatendar iti State of the Nation Address.
Inlawlawagna a saanen a piliten ti Palasyo no saan a kayat a mangngeg ni Vice President Sara dagiti programa ken inaramid a trabaho ti Presidente.
Maipalagip nga inabisoan ti Office of the Vice President (OVP) iti House of Representatives sakbay pay a naipatulod ti formal invitation para iti State of the Nation Address kadagiti opisial ti gobierno, diplomatic corps ken VIP guests.
Nupay kasta, mangiyalokar latta ti Kamara ti tugaw para ken ni Vice President Sara malaksid iti holding room a naikeddeng para kenkuana ken dagiti staff-na.
Kabayatanna, daytoy ti maikadua a gundaway a saan nga agatendar ni Vice President Sara iti State of the Nation Address ni Presidente Marcos kalpasan a saan manen a nagatendar iti napalabas a tawen ken dinutukan ti bagina kas “designated survivor.”
