LAOAG CITY – Inbatad ti Department of Foreign Affairs (DFA) nga awan pay ti impormasyon da no adda dagiti Pilipino nga apektado iti panangraot ti Estados Unidos iti tallo a nuclear sites ti Iran.
Nupay kasta, kuna ni Assistant Secretary Robert Ferrer nga addan dagiti panangbalakad da kadagiti Pilipino iti Iran nga umadayo da kadagiti pasilidad ti nadakamat a pagilian.
Inpakaammo ni Ferrer nga adda ti 1,200 a Pilipino idiay Iran no sadinno a siyam kadagitoy ket kiniddaw da ti pannakaibakwit dan.
Inlawlawag ni Ferrer a narigat ti umakar manipod Tehran agturong iti Turkmenistan border no sadinno nga agpaot ti 13 nga oras ti biyahe.
Iti baet daytoy, mangnamnama ni Ferrer babaen ti pannarabay ti Diyos a maaramid da ti mangibakwit kadagiti apektado a Pilipino kadagiti sumarsaruno nga aldaw.
Kabayatanna, inpasigurado ni Ferrer a dagiti personnel ti Embahada ti Pilipinas iti Tehran ti maudi a pumanaw iti Islamic Republic tapno masigurado a matulungan da amin dagiti Pilipino nga agkalikagom a pumanawen iti nadakamat a pagilian.
