LAOAG CITY – Kalikagum ni Mrs. Janice Cayetano, maysa kadagiti ina dagiti estudiante a maipagarup a pinabainan ti mangisursuro ti Mariano Marcos State University – College of Teacher Education a ni Dr. James Zandro Ventura III a maikkat iti unibersidad.
Segun kenkuana, daytoy ket kalpasan nga adda latta dagiti sumagmamano nga agad-adal a saan a mailinged a mabutbuteng gapu kadagiti naalas nga ugali nga ipakpakita ti nasao a mangisursuro kadagiti estudiantena.
Inbatadna a saanna a kayat nga agsardeng iti panagadal ti anakna ken dagiti dadduma pay nga estudiante gapu laeng iti maipagarup a panangibabain, panang-harass ken panang-bully ti maseknan a mangisursuro.
Kunana a maluksaw isuna kas maysa nga ina a maammoan nga ipabasura laeng ti nadakamat a mangisursuro ti nagbannogan ken nagpuyatan a proyekto ti anakna ken dadduma pay nga estudiante.
Mainaig iti daytoy, inpakaammona nga adda ti immun-unan a panagsinnaritada iti dati ken agdama a Dean ti College of Teacher Education maipanggep iti nasao a reklamo.
Innayonna a nag-post daytoy iti social media iti napasamak ti anakna ket ditoy a naduktalanna nga adu pay dagiti estudiante ti pinabainan ni Dr. Ventura III.
Iti agdama ket nakaawat ti Mariano Marcos State University ti uppat a baro a formal complaints kontra iti nasao a mangisursuro.
Kabayatanna, naammoan nga inton Hulio 11 ket mangiparuk-at ti pinal a desision ti Mariano Marcos State University mainaig iti sangsangoen a reklamo ni Dr. Ventura III.
