LAOAG CITY – Maiyuswat idiay Metro Manila ti NEO PLUS Program wenno Newly Elected Officials Performing Leadership for Uplifting Service para kadagiti baro a naelektaran nga opisial ditoy siudad ti Laoag.
Segun ken ni Ms. Chariz Garma, mangidadaulo ti Department of the Interior and Local Government ditoy siudad ti Laoag, manarimaan ti pangiplastar ti opisinada kadagiti agbalin a topiko iti pannakaisayangkat iti nasao nga aktibidad.
Inbatadna a kalpasan ti panagsapata dagiti naelektaran nga opisial ket napateg a dumalanda iti panagsanay maipanggep iti panangputar kadagiti ordinansa wenno resolusion a maipasa iti konseho.
Inlawlawagna nga awan ti mabayadan wenno maipasa nga aniaman a dokumento iti pannakipartisipar dagiti naelektaran nga opisial.
Kunana a babaen iti daytoy ket dakkel a tulong para kadagiti maseknan a naelektaran nga opisial tapno ad-adda a magun-od ti progreso ti siudad.
Innayonna a manamnama nga agpaut ti pannakaisayangkat ti nasao a programa iti uneg ti dua nga aldaw.
