LAOAG CITY – Nagdesision ti Monetary Board ti Bangko Sentral ng Pilipinas a saanen nga agiparuk-at ti 200 pesos a polymer banknote series.
Segun ken ni Mr. Gomer Gomez, Bank Officer II ti Bangko Sentral ng Pilipinas, daytoy ket kalpasan a naobserbaran ti Monetary Board ti Bangko Sentral ng Pilipinas a nababa ti demand daytoy ken bassiten ti agus-usar iti nasao a balor ti kuarta ditoy pagilian.
Gapu iti daytoy, inbatadna a ti laeng maiwarwaras a kuarta a polymer banknote series ket ti 1,000 pesos, 500 pesos, 100 pesos ken 50 pesos.
Inpasingkedna a dagiti nasao a polymer banknote series ket saanen a kaskarina a mapeke dagiti managgundaway gapu ta maidasig iti paper banknote, nalamlamuyot ti polymer banknote gapu ta naaramid daytoy iti polymer substrate a maysa a klase ti plastic. Nakaimprenta a buo ken awan ti nainayon ken naitapkal a paset iti tunggal polymer banknote.
Inlawlawagna a tapno saan a mabiktima ti peke a kuarta ket suroten laeng ti feel, look and tilt method tapno ditoy pay a makita ti nakatampok nga ayup, dagiti letra a B-S-P iti sabsabong a clear window ken dadduma pay.
Mainaig iti daytoy, kunana a dagiti indibidual a mapaneknekan a rinantada a dadaelen ti kuartada ket mabalin a sumango iti kaso gapu iti panaglabsingda iti Presidential Decree No. 247 a maibalud ti lima a tawen ken agmulta ti 20 a ribu a pisos.
Kabayatanna, inpakaammo ni Mr. Dennis Gudran, Senior Research Specialist ti Bangko Sentral ng Pilipinas a mabalin pay a masukatan dagiti daan wenno perdi a kuarta basta adda ti 60 a porsiento ti size daytoy, makita pay laeng ti signature wenno pirma iti kuarta ken buo pay ti security thread.
Innayonna nga awan ti aniaman a bayadan iti panagpasukat kadagiti kuarta iti Bangko Sentral ng Pilipinas.
