LAOAG CITY – Nangiparuk-at ti Korte idiay South Korea ti warrant of arrest kontra iti dati a Presidente a ni Yoon Suk-yeol.
Ti nasao a kaso ket kalpasan ti panangipatungpalna ti martial law idi Disiembre 3.
Nagatendar idi Mierkoles ni Yoon iti Korte iti Seoul para iti pito nga oras a panagdengngeg mainaig iti panangadal ti arrest warrant a kiniddaw dagiti prosecutors.
Inikkat iti puesto ni Yoon kas Presidente ti Constitutional Court ti South Korea idi Abril gapu iti martial law attempt no sadinno a maipagarup nga inabuso daytoy ti bileg.
Nagbubutos ti Parliamento idi Disiembre 14 iti napalabas a tawen a daytoy ket ma-impeach ngem kasapulan pay nga aprobaran ti Constitutional Court.
Naarestar ni Yoon idi Enero kabayatan nga isuna ti Presidente ken nawaya-wayaan idi Marso kalpasan a nawaswas ti pannakaarestarna.
Inawat ti Seoul Central District Court ti argumento ni Special Prosecutor Cho Eun-suk a nasken a maarestar ni Yoon gapu iti posibilidad a dadaelenna dagiti ebidensia.
Sumangsango ni Yoon kadagiti reklamo nga abuse of power, falsifying official documents ken obstruction of official duties pakairamanan dagiti kaso nga adda ti pakainaiganna iti pananggandatna a panangipatungpal ti martial law idiay South Korea.
Naglikudan ni Yoon ti alegasion ti prosecutor a maysa a klase ti rebellion ken pananggandat nga alaen ti puesto a napaut pakairamanan ti plano a panangibalud kadagiti kalabanna iti pulitika.
Maipalagip nga idi Hunio ket nangabak iti eleksion ti naiget a kabinnalubal ni Yoon a ni Lee Jae-myung.
