LAOAG CITY – Kalikagum ti administrasion ni Mayor James Bryan Alcid a mapagbalin a Level 2 Hospital ti Laoag City General Hospital.
Inbatadna a daytoy ket kalpasan a naobserbaranna ti in-inot a pannakapapintas ken pannakapasayaat ti pannakaipadanon ti serbisio medikal ti nasao nga ospital.
Inlawlawagna a kabayatan ti pannakaipresentar ti business review ti Laoag City General Hospital ket ditoy a naipakaammo dagiti napaspasamak iti ospital kas ti panagbaba ti mapaspastrekanda idi tawen 2017 gapu iti kinaawan dagiti mausar a medical equipment.
Kunana a sipod idi napasaran ti pandemia ket nagtultuloy a bimmaba ti mapaspastrekan ti nadakamat a balay-pagagasan.
Nupay kasta, inpakaammo ni Mayor Alcid a gapu iti panagbayad kadagiti utang ti Laoag City General Hospital ket simmayaat ti situasion ken operasion ti ospital.
Innayonna nga ad-adda pay a pumintas ti maipapaay a serbisio medikal kadagiti pasiente apaman a naan-anayen a maiplastar ti bacteriology services.
