LAOAG CITY – Manamnama ti pannakaestablisar ti Sports Center iti ili ti Pinili.
Daytoy ti naragsak nga inpakaammo ni Vice Mayor Maynard Francis Bumanglag iti nasao nga ili.
Inbatadna a planoda ti mangestablisar ti Sports Center a mabalin a pagpasiaran wenno pagay-ayaman dagiti turista wenno umili ditoy probinsia.
Kunana a daytoy ket masarakan iti Barangay Darat iti ili ti Pinili wenno ti highway iti nasao a lugar tapno masarakan nga insigida dagiti agkalikagum nga agpasiar.
Mainaig iti daytoy, mangnamnama ti Bise Mayor nga amin a planoda ket matungpal babaen iti panagtitimpuyog dagiti opisial ti barangay, department heads ken dadduma pay.
Kabayatanna, nagmayan ni Bumanglag iti agtultuloy nga ipapaay dagiti umili a talek ken suportada kenkuana iti sabali manen tawen a panagtugawna kas Bise Mayor iti nasao nga ili.
