LAOAG CITY – Ad-adda a mapaigetan ti pannakaimuntar ti Close Circuit Television wenno CCTV camera kadagiti establishimento iti ili ti Solsona.
Segun ken ni Vice Mayor Jonathan De Lara iti nasao nga ili, masapul nga adda ti nakaimuntar a Close Circuit Television camera kadagiti pasdek-negosio nga addaan ti minimum a 1.5 milyon a pisos a mapaspastrek iti negosioda.
Inbatadna a babaen iti daytoy ket tapno maipasigurado a natalged ken awan ti mapasamak nga insidente.
Kunana a dakkel a tulong kadakuada ti Close Circuit Television camera tapno mabalin a pakabigbigan dagiti agar-aramid iti maikanniwas iti paglintegan.
Innayonna nga addanto ti nayon a maimuntar a Close Circuit Television camera kadagiti barangay tapno mamonitorda ti agdama a situasion nangruna no adda ti kalamidad para iti al-alisto a panagresponde dagiti otoridad.
