LAOAG CITY – Inpakaammo ni Provincial Director Amelia Galvez ti Department of Trade and Industry nga adda iti umdas a suplay ti basic necessities ken prime commodities ditoy probinsia iti panawen ti kalamidad.
Segun ken Galvez, nagturong da kadagiti nagduduma a pasdek negosyo ditoy probinsia kangrunaan na ditoy ciudad ti Laoag, ciudad ti Batac, ken iti ili ti San Nicolas.
Daytoy ket tapno masigurado nga adda iti makonsumo dagiti residente no adda ti dumuprak a bagyo wenno aniaman a kalamidad.
Kunana nga awan dagiti negosyante a nagipangato ti presyo ken nagilemmeng kadagiti produkto da iti panawen ti kalamidad ditoy probinsya.
Nupay kasta, nagpalagip ni Galvez kadagiti negosyante a saan a gundawayan ti panawen ti kalamidad nga agipangato kadagiti presyo ken agilemmeng ti produkto tapno ilako ti nanginngina a presyo.
Kabayatanna, inpasigurado ni Galvez nga itultuloy da latta ti agmonitor kadagiti nagduduma a pasdek negosyo ken no adda ti maduktalan da nga aglabsing ti pagannurutan ket nakasagana da a mangipataw ti pannusa.
