LAOAG CITY – Naragsak nga inburay ni Mrs. Cherry Joy Garma, dati nga Information Officer ti Department of Education – Schools Division Office ditoy siudad ti Laoag a ti simple a passion project-na ket nagbalin a bassit a negosiona.
Segun kenkuana, nangrugi ti amin idi kanayon daytoy nga agitugtugot ti inartem a balangeg ken bawang iti opisinada no sadinno nga inparamanna daytoy kadagiti katrabahoanna ket ditoy a saanna a ninamnama a magustoanda met ti ramanna.
Inbatadna nga inyangawna laeng kadagiti katrabahoanna nga ilakona ti ar-aramidenna nga inartem a balangeg ken bawang iti opisinada banag nga immannugot met dagitoy kenkuana.
Gapu iti daytoy, napanunotanna ti agaramid ti bassit a negosio nga inawaganna ti original pickled kangkong ken pickled bawang.
Inlawlawagna a dagiti amin a ramen a mailalaok kadagiti ar-aramidenna nga original pickled kangkong ken pickled bawang ket isuna mismo ti mapan gumatgatang iti tiendaan kas ti balangeg, bawang ken sukang iloko.
Kunana nga idi damo ket uppat agingga iti walo a jar laeng ti ar-aramidenna ngem gapu iti umad-adu nga order-na ket dumanonen iti 100 a jar iti uneg laeng ti tallo a bulan sipod nangrugi daytoy.
Mainaig iti daytoy, inpakaammona nga addan ti uppat nga establishment outlet a mangal-ala kadagiti produktona tapno ilako kadagiti stores-da ditoy siudad ti Laoag, siudad ti Vigan ken idiay Metro Manila.
Naammoan a ti presio ti 280ml a pickled kangkong ket 150 a pisos ken 200 a pisos para iti 380ml idinto a ti presio ti 280ml a pickled bawang ket 170 a pisos ken 220 a pisos para iti 380ml.
Innayonna a basar iti panagsukisokna ket saan laeng a simple a panglaok kadagiti taraon ti produktona no diket adda pay ti maala a benepisio para iti salun-at kas ti pananglaban iti cancer cells, nabaknang iti antioxidants, nangato ti fiber-na ken dadduma pay.
