LAOAG CITY – Maamak ni Atty. Juanito Antonio, maysa a Private Lawyer no bilang i-shortcut ti Senado ti impeachment process ni Vice President Sara Duterte.
Segun kenkuana, daytoy ket kalpasan a maobserbaranna a kaaduan kadagiti Senador iti 20th Congress ket kalikagumda a lappedan ti pannakaiwayat ti impeachment trial kontra iti Bise Presidente.
Inbatadna a dakkel a makaapektar ti agbalin a desision ni Senate President Chiz Escudero no saanna a kalikagum nga ipursige ti pannakaisayangkat ti impeachment trial gapu ta adu kadagiti kakaduana a Senador ti umannugot kenkuana.
Inlawlawagna a masapul nga ituloy latta ti Senado iti pannakaisayangkat ti impeachment trial iti baet nga indeklarar ti Korte Suprema ti impeachment complaint nga unconstitutional.
Kunana nga iti baet nga adda ti inparuk-at a desision ti Korte Suprema ket saan pay a pinal daytoy gapu ta kasapulan nga iyuray ti sungbat ti Korte Suprema ti naipila a motion for reconsideration.
Immuna iti daytoy, sumagmamano a grupo ti nangiwayat ti tignay protesta iti sango ti Korte Suprema ita nga aldaw, Agosto 5 no sadinno a kiniddawda a maituloy iti pannakatingiting ni Vice President Sara Duterte iti sangsangoenna nga impeachment.
