LAOAG CITY – Kalikagum ni Presidente Ferdinand Marcos Jr. a mangiwayat nga umuna ti konsultasion kadagiti nagduduma a sektor mainaig iti gakat para iti naan-anay a pannakaipawil ti online gambling.
Segun iti Presidente, gagem a mangngegan pay laeng ti gobierno ti kapanunotan dagiti nagduduma nga stakeholders kas kadagiti padi ken nagannak nangruna ket dagiti agtutubo ti kangrunaan a nakatutok iti online gambling.
Inbatadna a kasapulanda a mangbukel nga umuna ti pagannurotan no ania ti nasken nga aramiden iti online gambling.
Inadmitirna a rinugiannan ti mangorganisar para iti maisayangkat a komperensia kadagiti amin nga stakeholders.
Kalikagum a maammoan ti Presidente no i-regulate daytoy ket asino ti mangidaulo ken no naan-anay a maipawil ket sigurado nga adda ti underground.
Maipalagip a naruay nga agpanpanday linteg ti nagpanawagan a rumbeng a naan-anayen nga ipawil ti online gambling gapu ta adu a biag ken pamilia ti naperdi gapu iti daytoy.
