LAOAG CITY – Balligi a naiyuswat ti maika-119 a tawen a panagkasangay ni dati a Gov. Roque B. Ablan Sr. iti Barangay 20 ditoy siudad ti Laoag nga addaan ti tema a “Panagkaykaysa para iti namnama: Strengthening Communities, Empowering Women and Sustaining the Land – Honoring the Legacy of Roque B. Ablan Sr.”
Naiyuswat ti wreath-laying ken panangidaton kadagiti sabsabong babaen iti Philippine National Police iti mismo Gov. Roque B. Ablan Sr. Shrine.
Malaksid iti daytoy, naipaayan pay ti 21 Gun Salute ni dati a Gov. Ablan Sr. babaen iti Philippine Marines.
Nagatendar iti nasao nga aktibidad da Gov. Cecilia Araneta Marcos, Mayor James Bryan Alcid, City ken Provincial Government officials ken dadduma pay pakairamanan ti pamilia Ablan.
Segun ken ni Department of Trade and Industry Assistant Secretary Kris Ablan, maysa kadagiti apoko ni dati a Gov. Ablan Sr., napateg nga iselebrar daytoy nga aldaw gapu ta nasken laeng a malagip dagiti Pilipino kangrunaanna kadagiti Ilokano ti kontribusion ken sakripisiona tapno saan a masakup dagiti Hapon ti pagilian.
Inbatadna a masapul laeng a mabigbig dagiti naaramidna kabayatan ti pananglabanna para iti pagilian nangruna ket isuna ket maibilang a bannuar idi World War II.
Inlawlawagna a rumbeng laeng a maimula kadagiti kapanunotan kadagiti umili nangruna iti baro nga henerasion nga insakripisio ti lolona ti bukudna a biag tapno laeng magun-od ti panagwaywayas ditoy pagilian.
Innayonna a saan a pulos a masubadan ti nagbalin a kontribusion ni dati a Gov. Ablan Sr. iti pakasaritaan ti pagilian.
