LAOAG CITY – Pagbalinen ti Nepal a libre ti panagsang-at iti 97 kadagiti kabanbantayan iti Himalayan iti sumaruno a dua a tawen tapno mapadur-as ti turismo iti dadduma a paset kadagiti nasulinek a lugar.
Daytoy ket kalpasan a maipangato ti permit fee nga umabot iti $15,000 mangrugi intono Setyembre ita a tawen para kadagiti sumang-at iti Mount Everest, ti maibilang kas kangatoan a bantay iti lubong.
Maibilang daytoy a kaunaan a pannakaipangato ti permit fee iti agarop maysa a dekada.
Mangnamnama ti Tourism Department ti Nepal a ti inisyatiba ket mangitag-ay kadagiti saan pay a naduktalan a produkto ken destinasyon iti nadakamat a pagilian.
Ti isasang-at iti kabanbantayan ti maysa kadagiti kangrunaan a pamastrekan iti Nepal no sadinno a ditoy ti pakasarakan ti walo manipod iti 10 a maibilang kas kangatoan a bantay iti intero a lubong.
Maipalagip nga idi Abril 2024 ket inbilin ti Korte Suprema idiay Nepal a limitaran ti bilang dagiti sumang-at iti Mt. Everest ken dadduma pay a kabanbantayan iti pagilian gapu ta kasapulan a respetaren ti kapasidad ti bantay.
