LAOAG CITY – Napaay a nangisubmitir ti Criminal Investigation and Detection Group (CIDG) iti Department of Justice (DOJ) kadagiti affidavit a naawat manipud kadagiti testigo iti kaso dagiti mapukpukaw a mammallot gapu ta saan a nasurot ti husto a proseso iti panangisagana kadagiti dokumento.
Inbatad ni Criminal Investigation and Detection Group Director PBGen. Christopher Abrahano, dagiti affidavit a naisubmitir kadakuada manipud kadagiti 12 a maipagarup a dati nga empleado ti whistleblower a ni Julie Patidongan idi Hulio 11 ket saan a dagiti imbestigador ti nagkolektar ti ebidensia.
Inlawlawag ni Abrahano a paset ti protocol ti Philippine National Police a nasken a tumulong dagiti imbestigador iti panangaramid ti affidavit tapno maipasigurado ti kinapudno a nakaipalaon iti daytoy.
Kunana a mabalin a personal nga agisubmitir dagiti testigo ti affidavit dagitoy a direkta iti Department of Justice ken awaten met laeng dagitoy para iti preliminary investigation.
Maipalagip nga inakusaran ni Atty. Bernardo Vitriolo, abugado ni Police Senior Master Sergeant Joey Encarnacion a maysa kadagiti akusado a pulis ti Criminal Investigation and Detection Group a maipagarup a laplappedan iti panangisubmitir ti affidavit dagiti testigo.
