LAOAG CITY – Nagballaag ni U.S. President Donald Trump ti naiget a ”consequence” no saan nga umannugot ni Russian President Vladimir Putin iti maysa a katulagan para iti pannakaisaknap ti kapia iti Ukraine iti taripnong da idiay Alaska ita nga aldaw.
Nupay saan nga inlawlawag ni Trump no ania dagiti ipatungpal da nga addang, kuna na a mabalin a karaman ditoy dagiti baro nga economic sanctions.
Kalpasan ti virtual a taripnong kadwa na da Ukrainian President Volodymyr Zelenskiy ken dagiti lider ti Europa, inpasigurado ni Trump nga awan ti agbalin a katulagan maipanggep iti teritoryo ti Ukraine no awan ti partisipasyon ti pagilian.
Inlungalong pay ni Trump ti posibilidad ti maysa a follow-up meeting kadwa na da Putin ken Zelenskiy no naurnus ti umuna a taripnong.
Innayon na a gagem ti maiwayat a taripnong idiay Alaska ket tapno idasar dagiti kalikagom para iti direkta a dayalogo ti tallo a partido.
