LAOAG CITY – Nagbinnara da Sangguniang Panlungsod Member John Michael Fariñas ken Sangguniang Panlungsod Member Donald Nicolas iti regular session ti Sangguniang Panlungsod ditoy siudad ti Laoag.
Namunganay daytoy kalpasan a kwinestionaran ni Fariñas no apay a nasertipikaran kas urgent ti tallo a gakat a naidasar iti konseho babaen ti City Administrator a ni Atty. Ed Von Cid.
Segun ken ni Fariñas, kas nakailanad iti pagannurotan ti Department of the Interior and Local Government, ti Local Chief Executive wenno ti Mayor laeng ti addaan ti bileg a mangsertipikar kas urgent ti maysa a gakat.
Nupay kasta, inlawlawag ni Nicolas a daytoy ket maipalubos gapu ta ti City Administrator ket agak-akemkas Officer In Charge iti agdama.
Inpettengna a no aniaman ti kabaelan nga aramiden ti Mayor ket isu met ti kabaelan nga aramiden ti Officer In Charge.
Daytoy nga argumento ni Nicolas kas Chairman ti Committee on Laws ket sinuportaran dagiti legal counsel ti City Government.
Innayonna pay nga abugado ti nasao nga Officer In Charge isu nga ammona ti ar-aramidenna.
Mainaig iti daytoy, napagnunumoan ti konseho nga agbutos no awatenda ti pannakasertipikarna kas urgent wenno saan.
Naammoan a kadagupan kadagiti amin nga agpanpanday linteg, 9 ti pimmabor, 2 ti saan a pabor ken 1 ti nag-abstain rason a naituloy kas urgent ti tallo a gakat.
Kabayatanna, dagiti nadakamat a tallo a gakat ket pakairamanan ti Draft City Resolution No. 13 SP-2025-056 wenno ti pannakabalbaliw iti pannakaiyalokar ti 6.5 milyon a pisos para iti pannakaipasdek ti sidewalk iti paset ti Bonifacio Street, Draft Appropriations Order No. 13-001 a pannakausar ti 15 a milyon a pisos manipud iti Laoag City General Hospital, Laoag City Public Market and Commercial Complex ken Slaughter House para iti operasion ti lokal a gobierno ken ti Draft City Appropriations Ordinance No. 13-002 pannakabalbaliw iti pannakausar ti 69 a milyon a pisos ken 82 milyon a pisos para iti operasion dagiti nagduduma nga opisina ti lokal a gobierno.
