LAOAG CITY – Nagatendar dagiti sumagmamano a kameng ti Parents Teachers Association ken mangisursuro ti Laoag Central Elementary School iti Sangguniang Panlungsod Session Hall ditoy siudad ti Laoag tapno ipasa ti resolusyon mainaig iti panangkontra da ti nailungalong a pannakaestablisar ti pocket park iti nasao a pagadalan.
Segun ken ni Mr. Wilhelm Peralta, Presidente ti Parents Teachers Association, iyur-urayda laengen ti agbalin a sungbat ti konseho iti daytoy a kalikagumda.
Inlawlawagna nga immunan nga adda ti panagturong dagiti City Government officials iti nasao a pagadalan tapno mangisayangkat ti ocular inspection ngem ti inpagarop da ket adalenda pay laeng ti pannakaestablisar ti parke isut gapuna a saanda a nangipaay a dagus ti reaksion.
Nupay kasta, nakigtot da kalpasan a naamoan da a naipasa daytoyen a gakat iti Sangguniang Panlungsod isut gapuna nga iti pannakaipresentar kadakuada nga stakeholders’ ti nasao nga addang ket saan da nga immanamong
Inlawlawag ni Peralta a nakailanad iti inpasa da a resolusion iti konseho nga adda dagiti saan a napintas nga epekto a makitada iti pannakaestablisar ti pocket park iti sango ti nasao a pagadalan kas ti pangta iti seguridad, panagadu ti tattao, ringgor, trapiko, panagadu ti agpalama, street vendors ken dadduma pay.
Ti nasao a resolusion ket pinirmaan dagiti nagannak, alumni ken dadduma pay a mangisursuro.
Kabayatanna, nagkedked a mangipaay pay laeng ti komento ni Sangguniang Panlungsod Member Bjorn Lao, Chairman ti Committee on Tourism gapu ta kunana a ni Mayor James Bryan Alcid ti mangited ti takder maipanggep iti daytoy.
Maipalagip a kalpasan ti public consultation ket inaprobaran ti konseho ti resolusion a mangkiddaw ti pundo iti Department of Public Works and Highways babaen ken ni Ilocos Norte 1st District Rep. Sandro Marcos para iti pannakaestablisar ti pocket park.
Inpanamnama pay ti konseho nga isarunoda a pakaammoan iti Diocese of Laoag mainaig iti daytoy a banag.
