LAOAG CITY – Inpakammo ni Senate blue ribbon committee chairperson Rodante Marcoleta a sumagmamano kadagiti personalidad a karaman iti maanomalya a flood control projects ket rimuar dan iti pagilyan iti baet ti imbestigasyon.
Segun kenni Marcoleta, adda dagiti nangibaga kenkuana a pakawanen na ida ken dagitoy ket addan iti pagilyan nga Amerika.
Inlawlawag ni Marcoleta nga awan ti bileg ti Senate panel a mangisyu ti hold departure order gapo ta ti laeng korte ngem mabalin da nga agkiddaw iti lookout order kontra kadagiti karaman a personalidad.
Kunana a suroten ti komite ti proseso ken no anya ti mabalin nga aramiden da ket isu ti ipatungpal da.
Mainaig iti daytoy, kuna ni Marcoleta nga adda ti nangipadanon kenkuana iti kinasagana na a mangibutaktak kadagiti agpanpanday linteg ken opisyal ti Department of Public Works and Highways a karaman iti iregularidad ngem agdudua daytoy gapo ta maipagarop nga adda ti pangta iti biag da ken ti pamilya da.
