LAOAG CITY – Inrakurak ni Presidente Ferdinand Marcos Jr. nga awan ti nailatang a baro nga alokasion para iti flood control projects iti 2026 national budget.
Segun iti Presidente, nagtalinaed a saan pay a nagastos ti 350 a bilyon a pisos a pundo manipud iti 2025.
Inbatadna a naikeddeng manen nga ipatulod ti Department of Budget and Management (DBM) ken Department of Public Works and Highways (DPWH) iti Kongreso ti revised budget proposal para iti 2026.
Inpasingkedna nga agtultuloy ti flood control projects ngem naig-igeten iti pannakatingitingna.
Inlawlawagna a kasapulan pay laeng nga iyurnos dagiti kontratista ti depektibo a proyekto sakbay nga ikonsiderar manen ti gobierno ti pannakikoordinarna.
Kabayatanna, inbasura ti Presidente ti panawagan dagiti sumagmamano nga agpanpanday linteg a “return to sender” ti nailungalong a 2026 National Expenditure Program kagiddan ti panangibagana a ti laeng Department of Public Works and Highways budget ti mabalbaliwan.
