LAOAG CITY – Adda dagiti maisayangkat a nagduduma nga aktibidad ditoy probinsia ita nga aldaw a kaaldawan ti panagkasangay ni Pres. Ferdinand R. Marcos Jr.
Daytoy ket babaen ti panagkikinamayet ti gobierno probinsial ken iti 1st District Congressional office.
Basar ti opisina ti diputado, adda ti maisayangkat a Naruay Panggedan Job Fair iti dakkel a mall iti ili a San Nicolas iti pannakikammayet ti gobierno probinsyal ken ti opisina ti diputado iti Technical Education And Skills Development Authority ken Department of Labor and Employment.
Ti maipatungpal a job fair ket pagbibinnuligan dagiti opisyal ditoy probinsya tapno ad-ado pay nga umili ti maipaayan ti trabaho.
Malaksid iti job fair ket adda pay ti maisayangkat nga “Handog sa Pangulo: Distribution of Agri equipment and inputs” iti kapitolio probinsial.
Mangnamnama ni Congressman Sandro Marcos a makatulong daytoy kadagiti mannalon a mangpasayaat pay iti produksion da iti intero a probinsia.
Kabayatanna, inpakaammo ti kongresista nga ita nga aldaw ket maipaima payen iti gobierno munisipal ti ili a Burgos ti agdagup ti 39-milyon a pisos a Farm to Market Road iti Brgy. Nagsurot iti nasao nga ili.
Innayon na a kas paset iti panangikalkalikagum ti pamilia Marcos a matagiben ti salun-at dagiti umili ket kiniddawda iti Department of Health a maisayangkat pay ti “Puro Kalusugan Caravan: Handog ng Pangulo” ditoy ciudad ti Laoag.
