LAOAG CITY – Kalikagom ti konseho iti ili ti Solsona nga ad-adda pay a paigetan ti maiyuswat a disinfection kadagiti amin a pagadalan iti nasao nga ili.
Daytoy ket kalpasan ti pannakasuspenso ti tallo nga aldaw a face-to-face classes iti amin a lebel iti pribado ken pampubliko a pagadalan iti nasao nga ili pakairamanan dagiti daycare centers gapu iti bigla lattan a panagngato ti kaso ti Hand, Foot and Mouth Disease.
Basar ken ni Vice Mayor Jonathan de Lara, nagbibinnulig ti Municipal Health Office, Municipal Disaster Risk Reduction and Management Council ken dadduma a maseknan a a departamento iti pannakaiwayat ti disinfection iti amin a pagadalan iti ili ti Solsona.
Inpakaammo ti bise mayor nga intono Lunes ket agsublin dagiti estusdyante ken mangisursuro iti pagadalan ngem masapol nga agusar dagitoy ti face mask ken alcohol tapno saanen a maiwaras ti virus.
Immunan nga inrakurak ni Mayor Joseph de Lara iti ili ti Solsona a sipud idi Enero ita a tawen ket nakairekord dan ti 151 a kaso ti nasao a sakit no sadinno nga ita laeng a bolan ti setyembre ket addan ti 76 a kaso nga ibilang na a makaalarma.
