LAOAG CITY – Naiyalokaran ti 1.5 a million a pisos a pondo ti City Health Office ken iti City Social Welfare and Development Office ditoy ciudad ti Laoag.
Segun kenni Mayor James Bryan Alcid, nakitana nga adda paylaeng nabati a pondo iti lokal a gobierno isut gapuna a naited daytoy kadagiti nadakamat nga opisina.
Inbatadna a gagem ti tagline ti administrasyon na nga “Alisto Asenso Progreso” ket saan laeng a maipanggep iti Alisto Negosio wenno iti business sector no di ket iti benneg iti salun-at.
Kunana a madoble ti pondo a para iti supply nga agas iti City Health Office ken iti Social Services iti City Social Welfare and Development Office.
Patien ti mayor a babaen iti daytoy ket ad-adda pay a maipaayan ti napinpintas a serbisyo dagiti umili ditoy ciudad.
