LAOAG CITY – Addan ton ti masurot nga oras a panangrugi ti paglako dagiti peddlers a nakapwesto iti daya a paset iti kapitolyo probinsial.
Daytoy ti inpakaamo ni Ms. Eva Marie Dumlao, ti Licensing officer III ti Business Permit and Licensing Office ditoy ciudad ti Laoag.
Segun kenkuana, mangrugi laeng ti panaglako dagiti peddlers iti oras iti alas dos ti malem ken awan dagiti mapalubusan nga aglako iti bigat.
Kunana a nabilin pay dagitoy nga ikkan da ti espasio iti pagnaan dagita umili nga agturong kadagiti esyablishmento iti abayda.
Mainaig iti daytoy, kunana a rumbeng a saan da a serraan dagiti arwangan a pagnaan dagiti kliyente nga agturong kadagiti establisimiento.
Nupay kasta, kuna ni Dumlao a pagsasaritaan danto paylaeng no sadinno ti napintas a pagplastaran dagiti peddlers a nakapwesto iti dayaen ti kapitolyo probinsial.
Innayon na a no malpas ti konstruksion iti kapitolyo probinsial ket mabalin a mapan danto agpwesto iti likod dagiti Toda tapno maymaysa a linya iti ayanda ken saan a mangitunda ti nairot a trapiko.
