LAOAG CITY – Naragsak nga inpakaammo ni Ms. Faye Jacinto a kas maysa nga estudiante pay laeng ket makapaspastrek daytoyen ti 15 agingga iti 20 a ribu a pisos iti kada aldaw gapu iti panaglakona kadagiti cupcakes ken pastries.
Segun kenkuana, nangrugi ti amin idi nag-bake daytoy ti cupcake idi kangitingitan ti pandemia no sadinno nga idi inparamanna laeng ti inaramidna a banana cupcake kadagiti nagannak ken kapamiliana ket ditoy a saanna a ninamnama a magustoan ken maimasanda ti ramanna.
Gapu iti daytoy, napanunotanna ti agaramid ti bassit ken simple a banana cupcakes ken inlakona kadagiti pagayam ken kabarangayanna banag a naimasan met dagitoy.
Inbatadna nga in-inot nga immadu ken dimmakel ti ilaklakona a cupcake gapu ta manipud iti banana cupcakes laeng ket nakaaramid pay ti dadduma kas ti carrot cupcakes, chocolate cupcakes, vanilla cupcakes ken cookies ken pastries.
Inlawlawagna nga iti tulong met ti social media ket ad-adda a naam-ammo ti negosiona rason nga adda dagiti ag-order kenkuana.
Kunana a dumanon iti 200 agingga iti 300 a cookies ti mailaklakona para kadagiti resellers, booth ken iti pagadalan.
Mainaig iti daytoy, kas panagyamanna iti Dios, inpannakkel ni Faye a no adu ti mapaglakoanda ket adda ti ipaayda a libre a pastries kadagiti tricycle drivers, constructions workers ken dagiti agdaldalus kadagiti kalsada.
Malaksid iti daytoy, kunana nga adda pay ti agarup lima a ribu a cupcakes wenno 400 a cupcakes iti kada aldaw ti ibunbunongda para kadagiti pulis, traffic enforces ken dagiti frontliners.
Inpettengna a ti maur-urnongna a kuarta ket saanna nga igatgatang kadagiti kayatna no diket kadagiti kasapulanna iti negosio tapno ad-adda a dumakkel pay daytoy.
Kabayatanna, naammoan nga iti agdama ket maysa a tourism student ni Faye iti Northwestern University ken Sangguniang Kabataan Chairperson.
