LAOAG CITY – Nangipasa ti dua a resolusyon ti Sang Panlungsod tapno komendaran ti dua a kameng iti konseho gapu iti pannaka-elektar da kas baro nga opisyal ti Philippine Councilors League – Ilocos Norte Chapter.
Naiwayat daytoy kabayatan ti sesyon iti Sang panlungsod ditoy ciudad ti Laoag.
Segun ken ni Vice Mayor Rey Carlos Fariñas, maragsakan gapu ta kadagupan iti nasurok a 200 a councilors ditoy probinsya ket napili ni Konsehal JB Baquiran kas Presidente ti liga idinto a naelektaran met kas Secretary- general ni Konsehal Bjorn Lao.
Inbatad ti bise mayor a mangipaneknek laeng daytoy a dagiti opisyal iti ciudad ti Laoag ket nalaing a mangidaulo ken ar-aramiden da a nasayaat ti trabaho ken responsibilidad da aglalo ti panangipaay ti napintas a serbisyo kadagiti umili.
Mangnamnama ti bise mayor nga iti pannakaelektar kas baro nga opisyal iti Philippine Councilors League – Ilocos Norte Chapter dagiti dua a konsehal ti ciudad ti Laoag ket ad-adda pay a maipakita ti makapnek a panagserbi da.
Kabayatanna, nagyaman ni Baquiran iti pannakapili na kas baro a mangidaulo iti Philippine Councilors League – Ilocos Norte Chapter.
Kuna na a naipakita ti panagkaykaysa da a kameng ti liga ditoy probinsya gapu ta awan ti limmaban kenkuana.
Inpasingked na nga aramiden na amin a kabaelan na tapno maannong na dagiti naipaima kenkuana a responsibilidad.
