LAOAG CITY – Saan pay a masinunuo no matuloy ti kaunaan a parliamentary elections ti Bangsamoro Autonomous Region in Muslim Mindanao (BARMM).
Daytoy ket kagiddan ti ruling ti Korte Suprema a nangipasardeng iti pannakaipatungpal ti Bangsamoro Autonomy Act No. 77 a mangiyakar ti pito a distrito iti rehion manipud idiay probinsia ti Sulu.
Inbatad ni Commission on Elections Chairman George Erwin Garcia a saan pay a nalawag no ania ti suroten ti poll body partikular no ti Bangsamoro Autonomy Act No. 77 wenno ti Bangsamoro Autonomy Act No. 58 a mangikeddeng laeng ti 73 a parliamentary seats ken isu ti immunan a sagsaganaan ti komision para iti eleksion.
Gapu iti daytoy, saan pay a sigurado ti Commission on Elections no ituloy ti eleksion agingga nga awan pay ti pinal a desision manipud iti Korte Suprema.
Inlawlawagna nga ad-adda a binigbig ti Korte Suprema ti kaudian a linteg a nangikeddeng ti 80 a puesto iti parliament, maisupadi iti agdama a sagsaganaan ti Commission on Elections.
Immunan a sinuspenso ti poll body dagiti panagsagsagana para iti Bangsamoro Autonomous Region in Muslim Mindanao elections.
