LAOAG CITY – Kinumpirmaran ni Justice Secretary Jesus Crispin Remulla a dupudop dagiti indibidual a mangipekpeksa ti interesda a mairaman iti Witness Protection Program (WPP) ti Department of Justice (DOJ).
Inbatad ni Remulla a naruay a tattao ti umas-asideg iti opisinada tapno agaplikar para iti proteksion ken seguridad nga ididiaya ti programa.
Gapu iti daytoy, nagdesision ti ahensia a kasarita ti dua agingga iti tallo nga aplikante nga interesado iti Witness Protection Program inton sumaruno a lawas.
Kunana a maysa kadagiti aplikante daytoy ket naggapu iti maysa a nalatak a construction firm a karaman iti top 15 ditoy pagilian.
Malaksid iti daytoy, kuna ti sekretario a namnamaenda pay nga umadu dagiti aplikante kadagiti sumarsaruno nga aldaw.
Inpetteng ni Remulla a ti proseso ti Witness Protection Program ket sensitibo ken saan a kaskarina no sadinno a ti tunggal aplikante ket dumalan iti naiget a pannakatingiting ken dagiti testimoniada ket maarisit tapno masigurado ti kredibilidad daytoy.
Maaddaan ti katulagan iti nagbaetan ti Department of Justice ken ti testigo. Nakailanad iti katulagan a ti testimonia ti testigo ket saan a mabalin nga usaren no awan ti pammalubos manipud kenkuana.
Kagiddan iti daytoy, siguradoen ti Department of Justice ti seguridad ti testigo iti amin nga oras. Daytoy ket kas paset ti inkarida a protektaran dagiti indibidual a tumultulong iti panangsolbar kadagiti krimen.
