LAOAG CITY – Naka-red alert status ti sibubukel a Rehiyon Uno gapo pay laeng napigsa a tudo ken angin gubuay ti Supertyphoon Nando.
Segun kenni Director Laurence Mina iti Office of the Civil Defense Region 1, umaboten iti 2,870 a pamilya wenno 9107 nga indibidual ti apektado iti intero a Rehiyon Uno gapo iti Supertyphoon Nando.
Kunana a sakbay a marikna ti kapigsa ti epekto ti Supertyphoon Nando ket addan ti 22 a pamilya wenno 73 nga indibidual ti adda kadagiti evacuation centers.
Inlawlawag na nga adda met ti naipaay a tulong kadagiti naibakwit kas kadagiti kangrunaan a kasapulan da babaen iti pannakikoordenar da iti Department of Social Welfare and Development Office Region 1.
Inbatad na a dagiti dadduma met nga apektado ket nakipagnaed da pay laeng kadagiti kabagyan da.
Mainaig iti daytoy, umabot iti 42 flooding incidents ti nairekord ti Office of the Civil Defense Region 1 ken adda pay ti napasamak a panagreggaay ti daga partikular iti Barangay Pancian iti ili ti Pagudpud.
Iti met probinsya ti Ilocos Sur, dagiti laeng dadakkel a lugan ti makalasat iti Barangay Sabuanan iti ili ti Sta. Lucia, kasta met iti Barangay San Juan, Candon City ken iti Barangay Saoat iti ili ti Sta.Cruz.
Iti probinsya ti La Union ket adda ti naapektaran a rangtay kangrunaan na iti San Fernando City.
Iti met panagpukaw ti serbisyo ti kuryente, ti probinsya ti Ilocos Norte laeng ti naapektaran iti rehiyon uno ken maituloy intono bigat ti restoration efforts gapo ta napigsa met ti tudo ken angin.
